Greinar á www.sus.is
Við skattleggum okkur ekki úr kreppunni
Stjórn Sambands ungra sjálfstæðismanna sendi frá sér ályktun þann 15. september um skatta og útgjöld ríkisins.Stjórn Sambands ungra sjálfstæðismanna geldur varhug við áætlunum ríkisstjórnarinnar um að auka skattbyrði fólks meira en nú er. Aukin skattheimta dregur þrótt úr launafólki sem hefur ekki svigrúm til að taka á sig frekari skattahækkanir. Kaupmáttur almennings hefur rýrnað verulega undanfarið árið og mikilvægt er að árétta að skattahækkanir valda beinni skerðingu á kaupmætti.
Þær hugmyndir sem fjármálaráðherra boðaði á dögunum bera það með sér að ekki einungis verða skattar hækkaðir á einstaklinga og fyirtæki, heldur er stefnt að koma á frekari skattþrepum með tilheyrandi jaðaráhrifum. Flókið og íþyngjandi skattkerfi leiðir á endanum til tekjuminnkunar ríkissjóðs þar sem hvatinn til að greiða skatt minnkar í öfugu hlutfalli við hækkun skattprósentunar og opnar á alls kyns undanskot og svartamarkaðsbrask.
Ungum sjálfstæðismönnum er fullljóst að tekjustofnar ríkisins hafa dregið stórlega saman nú á skömmum tíma og bregðast verður við erfiðri stöðu ríkissjóðs. Hluti af miklum tekjum ríkissjóðs undanfarin ár var byggður á bólu sem sprakk. En á sama tíma jukust ríkisútgjöld langt úr hófi fram. Ungir sjálfstæðismenn vöruðu ítrekað við þessari óheillaþróun. Eftir tekjuhrun ríkissjóðs sitja skuldinar eftir og gríðarlegur fjárlagahalli sem koma verður böndum á. Óhjákvæmilegt er því að skera verður ríkisútgjöld töluvert niður, og það meira en ríkisstjórnin ráðgerir. Það gilda sömu reglur um fjármál hins opinbera og gilda í heimilisbókhaldi landsmanna; þegar ekki er hægt að auka tekjurnar þá verða menn einfaldlega að skera niður útgjöld.
Rétta lausnin er sú að breikka þá tekjustofna sem fyrir eru með því að skapa efnahagsleg skilyrði fyrir því að hjól atvinnulífsins fari af stað á nýjan leik. Ríkisstjórnin verður að átta sig á að það eru takmörk hvað hægt er að hækka skatta mikið og af tvennu illu er betra að leggja frekar í sársaukafullan niðurskurð en skattahækkanir sem launamenn og fyrirtæki standa ekki undir.
Auglýsing
